Соништа: Божјиот заборавен јазик (2 дел)

Вашите старци ќе сонуваат соништа, а вашите момчиња ќе гледаат виденија. (Јоил 2:28 – Душан Х. Константинов)

Соништата не само што даваат низа вредни лични увиди, туку, како што е документирано, дале и многу креативни идеи. На пример, некои пронаоѓачи на сон добиле генијални концепти. Да се потсетиме сега како иноваторот Илајас Хауи ја создал првата машина за шиење. Имал големи потешкотии да ја создаде иглата. Кога речиси ги потрошил сите пари, сонил необичен сон. Сонувал дека треба да го погубат оти не создал машина за шиење за кралот на некоја чудна земја. Во сонот бил обиколен со стражари коишто в рака држеле копје во коешто имало дупка близу до врвот. Хауи се разбудил и поитал во работилницата. Перфектниот концепт за иглата му дошол в сон. По неколку часа, дизајнот за првата машина за шиење се приближувал кон завршетокот.
Сум слушнал дека некои велат оти теоријата на релативноста на Ајнштајн му дошла или на сон или во визија. Ја видел, велат, на сноп светлина. Прочитав некаде и дека првата електронска ламба на пронаоѓачот му се покажала на сон.
Дали всушност кога се исполнило времето овие откритија да дојдат на светот, Бог им ги дал на луѓе обучени да ги разберат и да ги применат? Или едноставно се случиле туку така? Претпочитам да верувам во првата опција.
Без разлика што веруваме за соништата, како што кажавме вчера, тие се дар даден од Бога – Тој ни ја подарил способноста за сонување. Дали ќе ги потиснуваме, како што прават мнозина, или ќе ги игнорираме, како што прават најголемиот дел од луѓето, или пак ќе решиме да ги користиме во креативни цели, како што е случај со некои - зависи само од нас!
Ако сакаш успешно да си ги запомнуваш и толкуваш соништата, држи пенкало и нотес покрај креветот, па штом ќе се разбудиш, запиши го секој сон којшто ќе ти остави силен впечаток. Така подоцна подобро ќе се потсетиш на сонуваното.
Ако треба да кажам за себе, соништата ми дале многу скапоцени увиди, кои се покажале како предуслови за растеж и закрепнување.

Молитва којашто сега би можел/а да Му ја упатиш на Бог:
Драг Боже, Ти благодарам за способноста за сонување. Помогни ми да го протолкувам правилно секој сон којшто е со намера да ми помогне да израснам; да разрешам некаков проблем или недоумица; да ме натера да извршам некакво добро дело; да помогнам некому којшто се наоѓа во премрежје; или пак сон којшто треба да ми даде битен увид. Исто така, помагај и да го сторам тоа што треба да се направи.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските права припаѓаат на ACTS International. Преземено и обработено со дозвола.
Copyright by ACTS International. Used by permission.

Соништа: Божјиот заборавен јазик (1 дел)

Примив сѐ и имам изобилно. Целосно сум подмирен. (Филипјаните 4:18 – Стандарден Превод)

Соништа... Имаат ли смисла и цел? Дали Бог сѐ уште им говори на луѓето преку нив?
Технички кажано, соништата се комуникација на десната, креативната хемисфера (половина) на мозокот со левата, логичната хемисфера. Тие се често визуелни симболи на она коешто го чувствуваме длабоко во себе. Клиничките испитувања покажуваат дека сонуваме цела ноќ, дури и ако не се сеќаваме што сме сонувале.
Сонувањето е еден од начините на природата да ни ја намали тензијата. Во едно испитување, луѓе коишто спиеле биле набљудувани со електронска опрема за да се утврди кога ќе почнат да сонуваат. Само што им почнувал сонот, биле разбудувани и сонувањето се прекинувало. Испитувањето морало да сопре после неколку ноќи, бидејќи луѓето вклучени во испитувањето станале премногу емоционално растроени.
Некои соништа може да бидат предизвикани од емоционален удар, други од стрес или физичка болка. Неколку дена после операцијата на Ахиловата тетива, којашто ја скинав двапати за три месеци, постојано сонував дека паѓам и ја кинам тетивата. Е, тоа беа кошмари!
Во други мигови, пак, сонишатата може да дадат интересни увиди. На пример, некои соништа јасно ми ги покажуваа конфликтите од детството коишто требаше да ги разрешам.
Повторените соништа на иста тема – на пример, кога постојано се обидуваме да избегаме од нешто, но не можеме да се помрднеме; или кога нѐ брка некој, а ние не можеме да му избегаме; или пак кога паѓаме, но не можеме да се фатиме за нешто – може да се сигнал за неразрешен страв или конфликт од минатото. Тие се начин на којшто природата нѐ предупредува дека треба да разрешиме некоја работа којашто одамна сме ја заборавиле.
Но, дали Бог и денес ни зборува преку соништата, онака како што правел во библиско време?
Мислам дека е така. Во една пригода, кога мојата организација „ACTS International“ се соочуваше со сериозна финансиска криза, се чувствував многу исплашен и обесхрабрен. Така, заспав во терминот за утринска побожност и имав фасцинантен сон. Во сонот слушнав глас којшто јасно ми вели: „Филипјаните 4:18 за мене има смисла“. Веднаш се разбудив, ја отворив Библијата и го побарав тој текст (види го на почетокот на овој пост – заб.прир.). Никогаш претходно не сум го учел напамет, па нема шанси да се измолкнал некаде од меморијата! Тој настан ме охрабри, а ние ја преживеавме таа криза.
Некои соништа можат да бидат од Бог. Најголемиот дел не се. Сепак, способноста за сонување е од Бог. Таа ни е дадена со одредена цел – во најмала рака да ни го намали стресот и да ни подари увиди корисни за личен и духовен растеж. Потешкотијата лежи во нивната правилна интерпретација. Но, преку молитва и искуства можеме да научиме да го извршуваме нивното толкување правилно и да го користиме креативно.
(Продолжува)

Молитва којашто сега би можел/а да Му ја упатиш на Бог:
Драг Боже, Ти благодарам за способноста за сонување. Помогни ми да разберам кога моите соништа ми посочуваат дека има проблем којшто морам да го разрешам или пак дека имам некоја обврска којашто морам да ја извршам, а потоа доведи ме до помошта којашто ми е неопходна да го направам тоа.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските права припаѓаат на ACTS International. Преземено и обработено со дозвола.
Copyright by ACTS International. Used by permission.

Сочувство и благост

Бидете љубезни еден кон друг, чувствителни, проштавајќи си еден на друг, како што и Бог ви прости вам во Христос. (Ефешаните 4:32 – Стандарден Превод)

Мајкл Џозефсон од „Карактер Каунтс“раскажува за некој човек што се возел во метрото со своите две деца, коишто многу галамеле и биле немирни. Човекот како да не бил свесен како му се однесуваат децата, па еден изнервиран патник го нападнал: „Господине, не гледате ли дека Вашите деца ги вознемируваат сите?! Како може да бидете толку нечувствителен?“
Човекот се расплакал: „Жалам! Мајка им само што почина и размислував како ќе се снаоѓаме без неа“.
Во истиот миг „правдољубивоста“ на критичарот се претворила во самоосуда.
„Зошто многумина од нас треба ,да добијат по тиквата` за да се сетат на грижата и сочувството? Следниот пат кога ќе бидете во ситуација да бирате помеѓу праведност и сочувство, изберете го сочувството“. (Michael Josephson, Character Counts, "Being Right or Being Kind." (533.5)

Молитва којашто сега би можел/а да Му ја упатиш на Бог:
Драг Боже, Те молам дај ми разбирање и сочувствително срце, за секогаш да бидам благ и љубезен кога е потребно разбирање и благост, за на секаков начин да може да станувам посличен на Исус.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските права припаѓаат на ACTS International. Преземено и обработено со дозвола.
Copyright by ACTS International. Used by permission.

Биди одговорен - постапувај правилно

Според тоа, јадете ли, пиете ли, или што и да правите, правете сѐ за Божја слава! (1 Коринќаните 10:31 - Стандарден Превод)

Денешната девоција е напишана од заповедник Ерик Џ. Бериман.
„УСС Асторија“ (Ц-34) е првиот воен брод-крстосувач на САД којшто стапил во борба со Јапонците, а тоа се случило во битката за островот Саво. Таа се одвивала во текот на ноќта помеѓу 8 и 9 август 1942 година. Иако имала два успешни погодоци во царскиот команден брод „Чокаи“, „Асторија“ била тешко оштетена и потонала веднаш после пладнето на 9 август.
Околу 2 часот после полноќ, Елџин Стејплс, врскар од трета класа којшто доаѓал од Средниот Запад, бил фрлен во морето од експлозијата на првиот 20-сантиметарски топ. Ранет во обете нозе од шрапнели и во полушок, тој се одржувал на површината само благодарение на малиот елек за спасување којшто го надувал со помош на едноставниот механизам за активирање. Околу 6 часот наутро, Стејплс бил спасен од еден разурнувач којшто пловел во близината и бил вратен на „Асторија“, чијшто капетан се обидел да ја спаси насукувајќи ја во плитко. Обидот не успеал, па Стејплс, сѐ уште носејќи го елекот за спасување активиран по експлозијата на топот, повторно се нашол во вода. Повторно бил спасен, овојпат од бродот „УСС Претседателот Џексон“ (АП-37). Бил еден од 500-тината преживеани во битката, коишто биле евакуирани на Ноумеа.
Додека патувале дотаму, Стејплс првпат почнал да го разгледува внимателно елекот којшто толку добро го послужил. Бил произведен од компанијата „Фајерстон Тајер енд Рабер“ од Акрон, Охајо, и имал регистерски број.
Кога добил домашно отсуство, Стејплс ја раскажал својата приказна на мајка си, којашто работела за „Фајерстон“ и ја прашал која е улогата на регистерскиот број на елекот. Таа му објаснила дека компанијата инсистира на лична одговорност во воената состојба и дека секој инспектор на производите има свој број, којшто се впишува на исконтролираниот производ. Стејплс добро го помнел регистерскиот број на производот, и ѝ го кажал на мајка си. Се покажало дека тоа е бројот на мајка му“. (Commander Eric J. Berryman, U.S. Naval Reserve, Proceedings, U.S. Naval Institute, vol. 15/6/1036 (јуни 1989 година), стр. 48. Цитирано на PreachingNow, на 28 март 2006 година)
Ако секогаш постапуваме правилно, оние на коишто најмногу ќе им помогнеме со таквото однесување, и тоа на безброј начини, сме ние самите и нашите најблиски.

Молитва којашто сега би можел/а да Му ја упатиш на Бог:
Драг Боже, Те молам помагај ми секогаш да постапувам правилно, без разлика на трошоците, загубите и тежината, за мојот живот да не помине напразно, и, за кога ќе го завршам животното патување, да ги чујам Твоите топли зборови: „Арно сторено, добар и верен слуго! Влези во радоста на својот господар!“.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските права припаѓаат на ACTS International. Преземено и обработено со дозвола.
Copyright by ACTS International. Used by permission.

Дали Бог ме казнува?

И така, исповедајте си ги гревовите еден на друг и молете се еден за друг, за да оздравите! Делотворната молитва на праведникот има голема сила. (Јаков 5:16 - Стандарден Превод)

Читател на „Дејли Инкаунтер“ ме прашува: „Можете ли да ми објасните зошто се чувствувам толку мизерно, виновно и несреќно од фактот дека не го исполнив моето ветување на Бог дека ќе престанам да пушам? Чувствувам дека Тој ме казнува за неуспехот и за прекршувањето на ветувањето“.
Не, не, не, не, не!
Бог не е таков. Тој не е татко којшто казнува, како што прават некои од татковците во овој свет - или можеби како што постапувал твојот татко кога си бил/а дете. Бог е многу поголем од тоа!
Всушност, казнувањето доаѓа од нас самите! Откажувањето од пушењето или која било друга зависност -  мала или голема - тешко дека би се реализирало само со давање ветување некому, вклучително и на Бог. Коренот на зависноста е симптом на поголем и подлабок проблем - и таа честопати се користи како средство за да се избегне вистинскиот дефект! Како што веќе многупати било кажано, симптомите се плод на длабок корен. Да се потсетиме сега и што рекол некој: „Бог е милостив - кога имаме неразрешени проблеми, ни дава (или ни дозволува да добиеме) симптоми!“
Секако, многу е важно да не го занемариме справувањето со симптомите, но она коешто Бог навистина го сака е да нѐ исцели на многу подлабоко ниво, онаму каде што е коренот на нашиот проблем. Симптомите треба да ни бидат аларм да ја побараме неопходната помош.
Затоа, најпрвин, треба да се молиш со вистинската молитва. Ако се бориш со зависност или со лоша навика, побарај Бог да ти даде увид и храброст да ги видиш причините за тој проблем (зависност или навика) - односно, зошто воопшто се појавил. Но проси и да видиш дали проблемот е бегство од соочувањето со некое неразрешено прашање во твојот живот? Побарај Бог да те соочи со вистината зад твојот проблем - односно со коренската причина, без разлика колку болно тоа би можело да биде за тебе.
Второ, барај Бог да те поведе кон помошта којашто ти е потребна за да ја надминеш зависноста, без разлика дали медицинска или психијатриска помош, како и да ти помогне да дојдеш до поддршка, без разлика дали во некој клуб на лекувани алкохоличари и слично.
Запомни, ако ги исповедаш своите неуспеси на Бог и ја побараш Неговата прошка, Тој секако ќе ги прости - секогаш, секогаш и секогаш! Исус рекол дека на оние коишто ќе ни згрешат треба да им простуваме седумдесет пати по седум, односно бесконечен број пати - а така и Бог ни простува нам... Но тоа не е оправдание за нас да се однесуваме како што сакаме, туку израз на Божјата љубов која ќе нѐ облее секојпат кога ќе ги побараме Неговата помош и избавувањето.

Молитва којашто сега би можел/а да Му ја упатиш на Бог:
Драг Боже, ти благодарам за симптомите коишто се сигнал за неразрешени лични проблеми. Мојата зависност (...именувај ја во овој момент...), ако е плод на длабок корен, само Ти можеш да ја поразиш. Дај ми увид да ги видам вистинските причини, храброст да се спротивставам, како и да ја исповедам мојата зависност пред Тебе и пред некој човек од доверба. Дај ми и мудрост да побарам помош во надминувањето на мојот проблем - и доведи ме до вистинската помош за мене.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските права припаѓаат на ACTS International. Преземено и обработено со дозвола.
Copyright by ACTS International. Used by permission.

Бог зборува - ако слушаш

Ова е чиста и неизвалкана религија пред Бога и Таткото: да се посетуваат сираците и вдовиците кога се во нивната невола, и да се биде неосквернет од светот. (Јаков 1:27 - Стандарден Превод)

Тинејџерот Коди отишол во мисија во Етиопија. Таму бил изложен на сиромаштија за каква што никогаш не сонувал дека постои. Во една ситуација, малечко момче го потегнало, покажувајќи му со тоа дека ја сака за себе маицата којашто Коди ја носел. Коди благо го оттурнал - и си ја зачувал маицата.
Кога се вратил во САД, почнал да се потсетува на ситуацијата. Сликата на детенцето не можел никако да ја избрише од мислите. Затоа Коди почнал кампања за собирање маици за сиромашните земји. Телефонирал илјадници пати, чукнал на многу врати, и на крајот собрал 18.000 маици, од коишто 10.000 биле употребливи. Откако разбрале за неговата акција, го побарале и новинарите од „Си Ен Ен“. Медиумската куќа пронашла авион којшто бесплатно ќе ги достави маиците - но не можела да гарантира каде тие ќе завршат. Хуманитарната агенција чијшто бил авионот го упатила во земја без царини - погодувате, нели? - во Етиопија! Луѓето коишто ги добиле маиците биле во екстаза. Исто и Коди. ("Vision--It's The Tool of The Spirit." Адаптирано од Џон Ортберг www.willowcreek.org).
Ако го бараме очигледното, големи се шансите да го видиме каде и да погледнеме. Ако сме „наштелувани“ на Божјата фрекфенција и живееме во хармонија со Неговата волја, секако ќе го видиме.

Молитва којашто сега би можел/а да Му ја упатиш на Бог:
Драг Боже, Те молам помогни ми да го гледам светот околу мене со очите на Исус и да бидам она коешто Тој би бил и да го правам она коешто Тој би го правел.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.
Copyright by ACTS International. Used by permission.

Кога Бог ќе те разочара

И што и да побарате во Мое име, ќе направам, за да се прослави Таткото во Синот. (Јован 14:13 - Стандарден Превод)

„Д-р Лесли Ведерхед, познат проповедник од 20. век, раскажува како еднаш во средно училиште имал многу тежок завршен испит. Но го открил тој познат стих: Што и да побарате во Мое име, ќе направам...
Ведерхед верувал дека тој стих значи дека сѐ што треба да направи е да побара и ќе го положи успешно тестот. Му кажал на Бог дека верува на Неговото ветување и дека сака добра оценка. Следниот ден се појавил на испитот. Но, кога оценките биле истакнати, констатирал дека паднал. Бил многу разочаран поради тоа. Се оттргнал од Бог и речиси отпаднал од верата. Дошол до заклучок дека ветувањата во Библијата не се за верување - поради тоа што Бог не му ја исполнил желбата за добра оценка.
Следната година повторно го слушал предметот. Учел напорно и положил. Тогаш решил дека Бог не му е потребен и дека ќе се снаоѓа сам.
Но, после неколку години д-р Ведерхед дошол до сознание дека неговите сопствени сили и способности се всушност сила којашто му ја дал Бог. Почнал да сфаќа дека Бог веќе му дал сила да го положи тестот, но не ја искористил во првиот случај“. (Пречесен Ричард Џ. Ферчајлд, „Our Desire and Our Growth“.)
Сигурен сум дека сите ние би можеле да се поистоветиме со Ведерхед по тоа што во одредени моменти сме очекувале од Бог да направи еден куп работи за нас без ние воопшто да се потрудиме или да вложиме многу малку сопствен труд. Но, за наша среќа - иако сега ова ви изгледа нелогично - работите не се такви!
Бог ќе го стори за нас само тоа што самите не можеме да го сториме. Токму затоа и го испратил Исус да умре за нас, бидејќи ние самите не можеме да се спасиме. Но помнете - Бог нема да го стори за нас тоа што е наша обврска. Ако постапува така, ќе нѐ направи нездраво зависни од Него и незрели.
Да, точно е дека Бог ги храни и птиците - но не им фрла храна во гнездата!

Молитва којашто сега би можел/а да Му ја упатиш на Бог:
Драг Боже, Те молам помогни ми да сфатам дека Ти си ги отворил Небесата и си дошол на Земјата за да ме спасиш од моите гревови, но и дека нема да го правиш за мене тоа за што претходно си ме оспособил. Помогни ми да запомнам дека личната одговорност е моја одговорност.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.
Copyright by ACTS International. Used by permission.

Атеизмот - интелектуално или морално прашање?

Небесата ја раскажуваат Божјата слава, небесниот свод го навестува делото на Неговите раце. Денот на ден му го објавува тоа, а ноќта на ноќ и` соопштува. Нема говор ни јазик, каде не ќе се чуе нивниот глас. (Псалм 19:1-3 - Душан Х. Константинов)

Неодамна го гледав ДВД-то "Journey Toward Creation ... Travel Back to When Light First Sprang from Darkness". Водител беше астрономот и писател д-р Хју Рос. Благодарение на модерните технологии, денес сме во можност да гледаме огромни пространства на вселената, движејќи се преку милиони светлосни години. Неверојатната великост на универзумот е вџашувачка. Да прифатиме дека сето тоа настанало случајно бара купишта повеќе вера отколку да веруваме дека сѐ е плод на разумна промисла на божествен Создател. А сепак атеистите тврдат дека нема Бог.
Ако речам дека нема Бог, себеси се правам конечниот авторитет и суд и така ја узурпирам улогата на Бог во мојот живот. Станувам бог сам на себе. Потоа, колку повеќе учиме за животот и колку пообразувани стануваме, сѐ повеќе сфаќаме колку малку знаеме за овој свет, а пак збор да не станува за целата вселена. Како што вели Томас Алва Едисон: „Сѐ додека човекот не направи дупликат на ливче трева, Природата може само да се смее на неговото тн. научно сознание... Очигледно е дека не разбираме ниту милионити дел од процентот од било што“. (Quote DB)
Без сомнение, има многу фактори зошто веруваме во тоа во коешто веруваме. За многумина, голем дел од верувањата се должат на нивното воспитување, на она на коешто биле учени во текот на нивното созревање. Системот на верувања на некој човек исто така е под влијание на тоа колку тој е чесен или нечесен во поглед на внатрешната вистина. На пример, доколку имам неразрешени и потиснати негативни емоции, одбраните коишто сум ги развил за да се штитам од допирот до тие болни емоции ми го заматуваат погледот и кон настаните во животот - и на крајот ќе бидам со извртен поглед на нештата. Како што вели Сесил Озборн: „Секоја непролеана солза (и закопано чувство) е призма низ која се распрснуваат сите повреди на животот“.
На крајот на краиштата, ние веруваме во она во коешто сме одбрале да веруваме - честопати тоа е нештото коешто го гледаме како најугодното за нас. На пример, ако одберам да верувам во Бог, знам дека сум одговорен во поглед на моралот. Од друга страна, ако одберам да не верувам во Бог, се заблудувам себеси со мислење дека не сум морално одговорен и дека можам да живеам како што ми е угодно. Да дадам пример. „Филозофот Мортимер Адлер, еден од великите интелекуалци на 20. век верувал дека христијанството е вистинито, но одбивал да го прифати, бидејќи би му се мешало во стилот на живот. Со време, тој ја надминал таа пречка и станал христијанин; нешто што, со оглед на доказите, била единствената разумна работа којашто можел да ја направи“, (Chuck Colson; BreakPoint, October 11, 2007)
Јас би се осмелил да додадам дека можеби, но само можеби, неговата лична чесност го довела до одлуката да го посвети својот живот на Бог и да стане христијанин.
Па, дали атеизмот е интелектуален или морален проблем? Како што би рекол Бил О`Рајли: „Ние пренесуваме, вие одлучувате!“

Молитва којашто сега би можел/а да Му ја упатиш на Бог:
Драг Боже, Те молам помогни ми да бидам чесен за да немам извртен поглед на светот и извртен поглед на реалноста. Те молам води ме по патот на вистината, за да може јасно да ја гледам сета вистина за Тебе, за универзумот и за сето создание.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.
Copyright by ACTS International. Used by permission.

Перфекционизмот и спасот од него

И така, бидете совршени како што е совршен вашиот небесен Татко. (Матеј 5:48 - Стандарден Превод)

Еден читател на „Дејли Инкаунтер“ ми пишува: „Христијанин сум, ама со сериозна дилема. Гледам постојано христијани коишто имаат голема радост во Господа, додека за мене христијанството е многу напорно секојдневно чекорење, знаејќи дека е невозможно да достигнам перфекција. Така, постојано потфрлам, што ми го прави животот депресивен (да, навистина сум голем перфекционист!). А логиката пак ми вели дека ако сум христијанин, треба да имам радост во Господа и животот не треба да ми биде напорна битка“.
Тажно, навистина тажно е сето ова! Но, фактот дека сме Божји деца воопшто не ни ги брише човечките слабости и не ги исцелува нашите емоционални рани. Перфекционизмот е емоционален проблем, и, иако нѐ засега духовно, не е духовен проблем којшто е поголем од тешката настинка, којашто истотака прави да се чувствуваме депресивно.
Зборот „перфектно“ во Библијата би можел слободно да се преведе и со „комплетно“, „здраво“ или „зрело“. Токму ова сознание би можело да ни помогне да се ослободиме од стапицата на перфекционизмот. Да, секако, треба да се трудиме да постигнеме одлични резултати, но перфекционизмот е емоционална болест. Тој исто така е проклетство, бидејќи постојано го држи перфекционистот во ропство.
Перфекционизмот вообичаено има корења во годините на развојот, кога детето морало да биде „перфектно“ за да се чувствува сакано - но сето тоа не е љубов! Тоа е условена „љубов“ и контрола и се заснова на постигањата наместо на тоа што личноста е. Затоа перфекционистот не може да биде среќен во таа состојба на умот, оти сѐ што ќе направи не е совршено, односно не може да биде доволно добро - и никогаш нема да се чувствува сакан/а поради тоа што е.
Исто така, може да биде речиси невозможно да се живее со таков човек, оти и тие околу него/неа не можат да достигнат перфекција.
Па, што треба да прави перфекционистот за да го надмине својот проблем?
Прво, треба да увиди и да признае дека е перфекционист. Прифаќањето е првиот чекор за разрешување на кој и да било проблем.  Одрекувањето пак нѐ држи постојано заглавени.
Второ, мора да увиди дека перфекционизмот е емоционална болест и дека му/ѝ е потребно излекување.
Трето, мора да побара од Бог да му/ѝ помогне да го препознае коренот на својот перфекционизам и да го/ја води до помошта којашто му/ѝ е потребна за да го надмине.
Запомнете исто така дека „Бог е милостив - кога имаме неразрешени проблеми, ни дава симптоми“. Перфекционизмот е симптом - или плод - на длабок корен и потребно е да се реши длабоко закопаниот проблем за да се надмине симптомот.
Четврто, би го охрабрил да побара компетентен христијански (професионален) советник којшто ќе му/ѝ помогне да презема мерки за да го разреши проблемот; инаку ќе се бори и ќе живее со него до крајот на животот.

Молитва којашто сега би можел/а да Му ја упатиш на Бог:
Драг Боже, Те молам помогни ми да сфатам дека не мора да бидам совршен/а за да ме сакаш, но исто така и дека сакаш да продолжам да созревам движејќи се кон духовна и кон емоционална зрелост - за да го вкусам и да го чувствувам Твојот мир во мојот секојдневен живот. Помогни ми да ја исповедам секоја област во мојот живот за којашто ми е потребно исцелување и води ме до помошта којашто ми е потребна за целосно да оздравам.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.
Copyright by ACTS International. Used by permission.

Како да станеш и останеш бедник...

(Непознат извор)
    Мисли само на себе. Разговарај само за себе. Користи го зборот „јас“ што почесто можеш. Непрестано огледувај се себеси во мислењето на другите. Стрвно слушај што зборуваат другите за тебе. Очекувај дека сите ќе те ценат.
    Биди сомничав. Биди завидлив. Биди осетлив на омаловажувања. Никогаш не простувај за критиките.
    Не верувај во никого освен во себе. Барај почитување и разбирање на твоите вредности. Барај сите да се сложуваат со твоите мислења до последната подробност.
    Биди зловолен кога луѓето нема да ти бидат благодарни за некоја наклоност што ќе им ја укажеш.
    Смали ги своите должности колку што можеш. Прави за другите што е можно помалку.

Законите се пријатели

Господовиот Закон е совршен - ја крепи душата; Господовото сведоштво е верно - му дава мудрост на неукиот. (Псалм 19:7 - Душан Х. Константинов)

Леонардо да Винчи рекол: „Природата никогаш не ги прекршува своите закони“. За среќа, така е. На пример, ако не постоеше законот на гравитацијата, Земјата не би можела да се одржи во својата орбита и сите ние би одлетале кон длабоката вселена. Ако се обидеме да ги прекршиме природните закони - на пример законот на гравитацијата, резултатот ќе биде само да увидиме дека не можеме. Тој обид единствено тешко ќе нѐ повреди или дури и ќе нѐ убие!
Постојат и универзални морални закони, без коишто општеството целосно би се распаднало. Ако ги прекршуваме тие закони, исто како и во претходниот случај, тие ќе нѐ скршат нас, или, уште поубаво кажано, самите ќе се разбиеме од нив! Но важни се и најголемиот дел од законите донесени од човекот. Тие го прават живеењето со другите остварливо. Замислете си само како би изгледало возење на некој автопат ако не се почитуваат сообраќајни правила!
Има и закони коишто го управуваат човековиот развој. На пример, на секое дете му се неопходни обемна грижа, безусловна љубов, прифаќање, во текот на годините на развојот. Кога тие закони ќе се прекршат, истото ќе се случи и со децата - мнозина од нив, жртви на такви „несреќи“, ќе завршат со скршени животи. Има и закони коишто се однесуваат на здравјето, среќата и благосостојбата на возрасните. Спротивставете им се, игнорирајте ги или прекршете ги тие закони и ќе се скршите себеси.
Бог ни дал и духовни закони... не за да ни ги одземе радоста и слободата, туку да ни ја подари полнотијата на животот и вечен живот. Прекршувањата на тие закони доведуваат до наша вечна пропаст.
Ги почитуваме и прокламираме тие закони не затоа што сме легалисти и мораме да ги почитуваме, туку бидејќи тоа го сакаме и одбираме да ги почитуваме, бидејќи знаеме дека ни се неопходни заради нашата благосостојба и благосостојбата на нашите сакани. Како што напишал псалмистот „Господовиот Закон е совршен - ја крепи душата; Господовото сведоштво е верно - му дава мудрост на неукиот; Господовите повелби се праведни - го веселат срцето; Господовата заповед е светла - ги просветлува очите; Стравот од Господа е чист - останува довека; Господовите судови се вистински - сите се еднакво праведни; Поскапоцени се од златото, од чистото злато; Послатки се од медот, послатки од капките на медовата пита. Твојот слуга е предупреден од нив, кој ги чува има голема награда“. (Псалм 19:7-11 - Душан Х. Константинов).

Молитва којашто сега би можел/а да Му ја упатиш на Бог:
Драг Боже, Те молам помогни ми да разберам дека сите Твои закони се за моја целосно благосостојба - и за овој живот и за оној којшто ќе уследи. Дај ми здрав разум и храброст секогаш да живеам во хармонија со Твоите закони, за да може да живеам во хармонија со себеси, со другите и со Тебе.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.
Copyright by ACTS International. Used by permission.

Биди смел во барањето

Сакајте и ќе ви се даде; барајте и ќе најдете; чукајте и ќе ви се отвори. Зашто секој кој сака добива; кој бара наоѓа и на оној кој чука, ќе му биде отворено. (Матеј 7:7-8 - Стандарден Превод)

Се зборува дека добар пријател на Хенри Форд, познатиот автомобилски магнат и втемелувач на гигантот „Форд“, многу се вознемирил кога Форд не купил голема полиса за животно осигурување од него. Кога го прашал својот пријател зошто купил полиса од целосен странец, а не од него, Форд му одговорил: „Ти никогаш не си ми понудил“.
Кога некој сака нешто од мене, сакам да ме праша директно, без да кружи или да се обидува да ме манипулира, итн. Според зборовите на Исус, Бог сака и ние да го правиме истото кога Му пристапуваме - да бидеме директни, детални и одлучни; односно директно да го бараме она коешто го посакуваме, оти „секој кој сака добива; кој бара наоѓа и на оној кој чука, ќе му биде отворено“.
Се прашувам колкумина од нашите лични познаници би дошле при Исус доколку се осмелиме да ги поканиме да го направат тоа - дури и преку давање или испраќање по пошта на вкусно подготвена евангелизаторска брошура или пак книга, или пак преку препорачување на веб-сајт или на веб-страница коишто го пренесуваат повикот на Исус упатен до секој грешник.

Молитва којашто сега би можел/а да Му ја упатиш на Бог:
Драг Боже, Те молам помогни ми да бидам директен и смел во сите свои комуникации со Тебе, но и со моите најблиски пријатели. Помагај ми да го барам и искрено да копнеам по секој благослов и добар дар којшто Ти сакаш да ми го дадеш. Те молам и да ми дадеш храброст да ги поканам моите пријатели и роднини да Те прифатат како свој личен Спасител и Господ.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.
Copyright by ACTS International. Used by permission.

Да се биде ОК или не-ОК?

Среќен е оној, на којшто престапот му е простен, чиј грев е покриен! Среќен е човекот, кого ГОСПОД за грев не го обвинува и во чиј дух нема измама!
Додека настојував да премолчам, коските ми се сушеа од секојдневните воздишки. Дење и ноќе, Твојата тешка рака ме притискаше, како на летна жега, снагата ми премалуваше.
Тогаш, гревот мој пред Тебе го признав и својата вина повеќе не ја криев. Реков: ,Ќе го признаам пред ГОСПОДА својот престап’ - и Ти ми ја прости вината за гревот. (Псалм 32:1-5 - Д-р Иван Грозданов)

„Јас сум ОК - Ти си ОК“ на Томас Харис е многу популарна книга од областа на популарната психологија издадена кон крајот на 1960-тите. Некои луѓе сугерираат други наслови за неа, како: „Јас не сум ОК и Ти не си ОК, ама Тоа е ОК“, или пак, што не е изненадувачко во нашата култура, многу посаркастичниот „Јас сум ОК - Ти си идиот“.
Во својата книга „Свесност“ Антони де Мело вели: „Луѓето велат ,Мислам дека си многу шармантен’, па јас се чувствувам ОК. Добивам позитивен поттик (а тоа го поткрепува моето его и јас се чувстувам прекрасно, барем накратко). Но, еден ден ќе напишам книга чиј наслов ќе биде „Јас сум магаре, Ти си магаре“. Тоа е најослободувачката, најпрекрасната работа на светот - кога отворено ќе признаеш дека си магаре. Тоа е прекрасно. Кога луѓето ми велат: ,Грешиш’, јас велам: ,Што можеш да очекуваш од магаре?’ (Anthony De Mello, Awareness) (Внимавајте, Де Мело всушност користи друг збор на местото каде што јас пишувам „магаре“)
И сега, пред да ме откачите како будалетинка којашто истресува теории од популарната психологија, да видиме што отец Де Мело всушност вели; односно да се вразумиме и да признаеме кои сме навистина. Тоа пак воопшто не е понижување, оти само ако се видиме онака како што нѐ гледа Бог, ќе бидеме слободни да се смениме и да станеме сето она што Бог го предвидел за нас. Всушност, сѐ додека не признаеме кои сме навистина и не се прифатиме себеси какви што сме - со сите чиреви (т.е. дефекти и слабости) - не сме слободни да се смениме и да растеме, бидејќи се сокриваме зад маска и живееме во одрекување - што пак е состојба којашто дефинитивно ќе нѐ порази и е, во крајна мерка, смртоносна.
Како што вели кралот Давид во библискиот текст за денеска, тој се исполнил со радост кога излегол од одрекувањето, почнал да живее во потполна искреност и ги исповедал своите гревови и ја примил Божјата прошка. Сета негова вина исчезнала! Тоа е навистина прекрасен и радосен начин на живот.
Не заборавајте дека иако Бог ме сака онаков каков што сум, Тој ме сака премногу за да ме остави во состојбата во којашто се наоѓам. Тој сака да израснам во целокупноста на моето спасение и да станам сето она коешто Тој го замислил за мене.

Молитва којашто сега би можел/а да Му ја упатиш на Бог:
Драг Боже, Те молам избави ме од гревот на одрекувањето и дај ми храброст да се видам себеси онака како што ме гледаш Ти - и да се прифатам како што ме прифаќаш Ти - па да бидам ослободен, со Твоја помош, да станам сето она коешто Ти си го замислил.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.
Copyright by ACTS International. Used by permission.

Какво промашување!

Луѓето од ова поколение... се како децата кои седат по пазариштата и си викаат едни на други: ‘Ви свиревме, а не игравте! Ви пеевме жални песни, а не плачевте!‘ (Исус: Лука 7:32 - Стандарден Превод)

Најпрво, дозволи драг читателу да ти посакам среќен празник - Рождество Христово!
Еден декемвриски ден во 1903 година во Кити Хок, во американската држава Северна Каролина, Орвил и Вилбур Рајт, после голем број неуспеси да полетаат со својата машина потешка од воздухот, влегоа во историјата. Постигнаа нешто што претходно не му пошло од рака на ниту еден друг човек. Во екстаза, тие ѝ испраќаат телеграма на сестра си Кетрин: „Прелетавме 852 стапки (259,7 метри - заб. прев). Ќе бидеме дома за Божик“.
Со огромна радост, Кетрин отрчува до редакцијата на локалниот весник и телеграмата - која е најголемата новинска приказна на новиот век - му ја дава в раце на уредникот. Откако ја прочитува, тој се насмевнува и вели: „Да, да, прекрасно! Момците ќе се вратат дома за Божик“.
Се прашувам колкупати и ние ја промашуваме поентата на миговите кога Бог прави ново дело меѓу нас. Религиозните луѓе од Христовото време, коишто всушност го очекувале Неговото пристигање како Месијата, целосно промашиле - не Го препознале и, иронично, дури и средиле Тој да биде распнат. Причината? Тој не дошол и не се однесувал онака како што тие мислеле дека ќе дојде и ќе се однесува.
Навистина трагично е и тоа што денес многу луѓе целосно ја промашуваат смислата на Божик (Рождество Христово). Целосно пропуштаат да сфатат дека со Своето раѓање на Божик Исус Христос, Синот на Живиот Бог, облекувајќи се во обвивката на обично човечко тело, излегол од Својата „палата“ на Небесата. Со тоа Тој се поистоветил со паднатото човештво и слегол на Земјата за да умре на суровиот Римски крст и така да ја плати казната за твоите гревови, исто како и за моите; за да може потоа Бог без каква било надомест да ни удели прошка за сите гревови и да ни го подари вечниот живот. Нема поголема трагедија во животот од онаа да се промаши Божјиот дар на простувањето на сите гревови и на дарувањето на вечниот живот.
Што и да правиш, немој да дозволиш да ја промашиш смислата на овој Божик. Прифати ја Божјата прошка и вечниот живот. Доколку ти е потребно дообјаснување или помош, можеш да се обратиш на авторот на овој блог или пак на следниот блог: goshev.blog.mk.

Молитва којашто сега би можел/а да Му ја упатиш на Бог:
Драг Боже, Те молам помогни ми да ги сфатам вистинската смисла и цел на празникот Рождество Христово и да ги повлечам вистинските чекори за да го примам Твојот дар на прошката и на вечниот живот, за така да станам вистински христијанин и следбеник на Исус Христос.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.
Copyright by ACTS International. Used by permission.

Пред да речеш „да“

Надевај се на Господа со сето свое срце и не се потпирај врз сопствениот разум. Мисли на Него на сите свои патишта и Тој ќе ги исправи твоите патеки. (Пословици 3:5-6 - Душан Х. Константинов)

Читателка на „Daily Encounter“ ми го напиша следново: „Мојот син се забавува со една девојка којашто се обидува да го присили да се земат, иако одвај се познаваат. Што да го советувам?“
Бидејќи Вашиот син законски е возрасен, нема што многу да се стори, освен ако не побара Ваше мислење. Кога би бил мој син и би ми побарал совет, а би бил христијанин, јас би го сторил следново:
1. Би го поттикнал да се моли усрдно за Божјо водство, а посебно за тоа Бог да му ја открие вистината и за него и за неговата девојка и за нивната врска. Кога физичката привлечност и/или потреба е силна, двојките честопати се слепи за реалноста и стапуваат во брак пред вистински да се запознаат еден со друг, и, уви!, предоцна откриваат дека направиле огромна грешка. Но, ако вистината се увиди пред венчавката, барем тој којшто искрено сака да ја спознае вистината, ќе знае што треба да се стори.
2. Би го посоветувал да се обиде да ги добие најдобрите можни предбрачни советувања заедно со неговата потенцијална животна другарка, бидејќи тоа е одличен начин да се види вистината за другиот, за да може да оценат дали си одговараат или пак работите стојат поинаку.
3. Би го предупредил дека секој којшто навалува прерано да се стапи во брак и пред да се минат соодветните предбрачни советувања, или чувствува преголема потреба или е премногу зависен човек, и/или пак крие недостаток на карактерот - веројатно станува збор за некој сериозен недостаток - па сака да улови партнер пред да бидат откриени неговите/нејзините мани.
4. Ако мојот син е христијанин, а неговата пријателка не е втемелена во Божјото Слово, јасно и недвосмислено би му кажал НЕ! Та, Библијата јасно ни порачува: „Не впрегнувајте се во нееднаков јарем со неверниците! Впрочем, што има заедничко праведноста со беззаконието? Или какво заедништво има светлината со темнината?“ (2 Коринќаните 6:14 - Стандарден Превод). За здрава и цврста врска, од непроценлива важност е обајцата да се емоционално созреани и духовно во хармонија еден со друг.
5. Над сѐ, би го охрабрил мојот син искрено да го бара Божјото водство за таа врска, како и да стори сѐ и тој и неговата потенцијална сопруга да се молат редовно и да го ставаат Бог на прво место и во нивниот личен живот и во врската и ако решат да се земат, но и ако решат поинаку. Ако тоа не го утврдат пред венчавката, тешко дека ќе се случи потоа.

Молитва којашто сега би можел/а да Му ја упатиш на Бог:
Драг Боже, Те молам помогни ми да бидам добар пример на христијанин за своите деца, за тие, гледајќи го мојот живот, да посакаат Ти да бидеш на првото место во нивните животи и секогаш да го бараат Твоето водство и да се трудат да живеат во хармонија со Твојата волја.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.
Copyright by ACTS International. Used by permission.

Влијанието на Црквата врз семејството

Не напуштајќи ги заедничките собирања, како што некои имаат обичај, туку да се бодриме еден со друг, и тоа толку повеќе, колку што гледате дека наближува Денот! (Евреите 10:25 - Стандарден Превод)

Студија којашто пред извесно време ја извршил социологот Стивен Нок од Универзитетот на Вирџинија покажува дека веројатноста двојките коишто редовно посетуваат црква да се во прв брак е за 42 проценти поголема отколку кај двојките коишто не доаѓаат редовно на богослужбите. А пак оние луѓе во црква коишто се предадени на своите верувања имаат за 23 проценти поголеми шанси да имаат „многу среќен“ брак во однос на луѓето коишто не одат в црква.
Понатаму, според извештај на Ворен Мулер, во семејствата во коишто обата родители се редовни на богослужбите, 72 проценти од децата продолжуваат да живеат во верата. Од семејствата во коишто само таткото посетува црква, процентот опаѓа на 55 проценти, а во оние во коишто само мајката е редовна на богослужбите, бројката драстично се намалува на само 15 отсто од децата.
Треба ли уште да објаснувам?

Молитва којашто сега би можел/а да Му ја упатиш на Бог:
Драг Боже, Те молам помогни ми да бидам активен учесник во здрава црква и да имам позитивни врски со браќа и сестри христијани - и заради мојот растеж и заради поддршка на другите.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.
Copyright by ACTS International. Used by permission.

Законот на ѓубреџискиот камион

Сте чуле дека било речено: „Љуби го својот ближен“ и “мрази го својот непријател“. А Јас ви велам: Љубете ги своите непријатели и молете се за оние што ве прогонуваат; Зашто ако ги љубите оние кои ве љубат вас, каква награда имате? Зар истото не го прават и даночниците? И ако ги поздравувате само своите браќа, што правите повеќе од другите? Зар не го прават истото и другите народи? (Матеј 5:43-44; 46-47 - Стандарден Превод)

Мајк Бенсон прашува: „Колку често дозволувате ирационалните и груби постапки на другите луѓе да Ви го сменат расположението? Дали дозволувате некој лош возач, нељубезен келнер, груб шеф или пак невнимателен и несериозен вработен да Ви го расипат денот? Знак за распознавање на успешната (зрела) личност е колку бргу успева да го поврати фокусот кон битните нешта.

Еднаш со такси тргнав кон Големата централна железничка станица. Возевме по десната лента и во еден момент црн автомобил којшто беше паркиран ненадејно тргна, токму кога бевме зад него. Таксистот нагло закочи, таксито зализга, но сепак го избегнавме судирот со црниот автомобил - за само неколку сантиметри! Возачот, којшто за малку не предизвика сериозна сообраќајна незгода, се сврте - и почна да нѐ пцуе!!! Таксистот пак само се насмевна и му мавна на грубиот возач... Ама тоа го стори со навистина пријателски дух.

Веднаш го прашав: „Зошто така постапуваш? Па тој замалку ќе ти го уништеше автомобилот и ќе нѐ испратеше в болница!“ Тоа што таксистот потоа ми го одговори сега го нарекувам ,Законот на ѓубреџискиот камион`. Тој ми рече: ,Многу луѓе се како ѓубреџиски камиони. Се движат полни со ѓубре, полни со фрустрации, полни со гнев и полни со разочарување. Кога ѓубрето во нив ќе се натрупа, потребно им е место да се испразнат. Ако им го дозволиш тоа, ќе се испразнат врз тебе. А кога некој сака да се испразни врз тебе, не го сфаќај тоа лично. Само насмевни се, мавни му, посакај му сѐ најдобро и врви понатаму`.

Тогаш почнав да размислувам колку често сум дозволувал ,ѓубреџиски камиони` буквално да ме прегазат... И колку често јас сум го собирал тоа ѓубре и сум го истурал врз други луѓе: на работа, дома, на улица... Затоа тој ден се заветив: „Повеќе нема да постапувам така“. (Mike Benson, KneEmail. За да се регистрирате за бесплатни дневни читања на англиски јазик по електронска пошта, испратете празно електронско писмо на: kneemail-subscribe@welovegod.org)“

Но, како што мнозина од нас знаат, тоа е лесно да се каже, но не и да се направи. Кога избувнуваме кон луѓето коишто го „истураат своето ѓубре“ врз нас, всушност треба да знаеме дека тоа што другиот го прави е негов/нејзин проблем - но кога ќе изрегираме, станува и наш. А за да можеме пак да регираме на вистинскиот начин, односно Христолико, треба пред сѐ да се ослободиме од нашето ѓубре. Ако не постапуваме така, ќе им дозволуваме на другите да ги контролираат нашите расположенија и да спотнуваат ерупции на нашите натрупани проблеми.

Молитва којашто сега би можел/а да Му ја упатиш на Бог:

Драг Боже, Те молам помагај ми да согледам кога ќе реагирам претерано и неправилно на она коешто ми го прават другите, како и да ги решам моите проблеми за да може, со Твоја помош, секогаш да одговорам на другите (без разлика како постапуваат тие) на љубезен и Христолик начин.

Ти благодарам што ја чу мојата молитва и одговори на неа! Во името на Исус, амин.

---

Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.

Copyright by ACTS International. Used by permission.

Остави впечатлив белег во годината пред тебе

Браќа, јас уште не мислам дека го достигнав тоа, но сепак правам едно: го заборавам она што е зад мене, а се стремам кон она што е пред мене; трчам кон целта, за наградата на горното призвание од Бог во Христос Исус. (Филипјаните 3:13-14 - Стандарден Превод)

Ви посакувам, драг читателу, многу среќна и успешна нова година!!!
Очигледно е дека секогаш, ама баш секогаш - минатото е зад нас! Иако можеби сакаме, не можеме да го поправиме; но затоа можеме да ја почнеме новава година со надеж и со план, имајќи ги притоа пред очи можеби и зборовите на Мини Хескинс, којашто го вели следново: „И му реков на оној којшто стоеше на капијата на годината „Подари ми светлина за да можам безбедно да чекорам во Непознатото“. Тој одговори: „Навлези во темнината и стави ја својата рака в раката на Бог. Тоа за тебе ќе биде подобро од светлина и побезбедно отколку позната патека“.
Не можам да замислам подобар начин да се почне Новата година, и со Божја помош, „оваа година нека биде подобра од сите минати. Дадете си збор дека ќе сторите некои работи коишто секогаш сте сакале да ги реализирате, ама не сте нашле време. Повикајте некој заборавен пријател. Избришете стара лутина и заменете ја со пријатни спомени. Ветете си дека нема да давате ветувања за коишто не сте сигурни дека ќе ги исполните. Чекорете исправено, повеќе насмевнувајте се. Така ќе изгледате десет години помлади. Не се плашете да кажете „Те сакам“. Кажувајте го тоа одново и одново. Тоа за најслатките зборови на светот.“ (Ен Лендерс)
И додека годините сѐ побргу ми врват, станувам сѐ посвесен за фактот дека животот е кус за секого. Затоа погрижи се во 2010 година да инвестираш во вечните вредности, оти сите ние имаме само еден живот којшто бргу ќе згасне, а само довереното на Христа ќе остане.

Молитва којашто сега би можел/а да Му ја упатиш на Бог:
Драг Боже, Ти благодарам за оваа, уште една, година во којашто можам да Ти служам. Те молам помогни ми да ја инвестирам мудро, во неуништливи вредност, за кога ќе застанам пред Тебе лице в лице, да можам да ги чујам Твоите топли зборови: „Добро сторено, добар и верен слуго. Влези во радоста на својот Господ.“
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.
Copyright by ACTS International. Used by permission.