А ние сите, со откриено лице, гледајќи ја како во огледало Господовата слава, и се преобразуваме во истиот лик од слава во слава, така како што го прави тоа Господ, Духот. (2 Коринќаните 3:18 - Стандарден Превод)
„Еден од најистакнатите скулптори во историјата на САД е Гатзон Борглам. Тој е нашироко познат пред сѐ по главите на четирите претседатели исклесани со динамит и макотрпно рачно делкање во дел од планината Рашмор во државата Јужна Дакота, а веројатно најценет е поради неговата биста на Абрахам Линколн поставена во Капитолот на САД во Вашингтон.
Таа биста Борглам ја извајал од голем блок мермер којшто долго време бил во неговото ателје. Чистачката долго време метела околу бесформната маса мермер. Но еден ден, кога Борглам веќе понапреднал со работата, таа забележала дека може да го распознае лицето на Линколн во мермерот. Се свртела кон Борглам и запрашала: „Дали е тоа г-дин Линколн?“
„Да“, ѝ одговорил Борглам.
„Па, како знаевте дека е таму внатре?“, го прашала повторно.
Големиот скулптор знаел, оти имал двоен вид. Сите големи уметници имаат таква дарба. Тие го гледаат она што е и она што може да биде“. (Leader Links)
Многу години претходно Микеланџело кажал сродна работа: „Видов ангел во мермерот и клесав сѐ додека не го ослободив“.
Така и мене и тебе нѐ гледа Бог. Тој го гледа „ангелот“ (нашиот Бого-даден потенцијал) и кога сме Му вистински посветени, преку Неговиот Дух Тој постојано ќе нѐ „клеса“ сѐ додека не станеме она коешто Тој го наумил за нас.
Молитва којашто сега би можел/а да Му ја упатиш на Бог:
Драг Боже, Ти благодарам зашто кога ќе Ти го предадам мојот живот, преку Својот Дух, Ти ме обликуваш во човекот којшто сакаш да станам, онаков каков што Ти си ме обмислил. А кога Твоето клесање ми е болно, помогни ми да сфатам дека тоа е дел од Твојата работа на усовршување на мојот живот.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.
Copyright by ACTS International. Used by permission.
