Сметајте дека е вистинска радост, браќа мои, кога ќе се сретнете со разни испитувања, знаејќи дека од испитувањето на вашата вера произлегува истрајност. А од истрајноста - совршено дело, за да бидете совршени и целосни, без нешто да ви недостига. (Јаков 1:2-4 - Стандарден Превод)
Во помладите години бев директор на младинска мисија за Јужна Австралија. Најголемиот дел од мојата служба беше предавање веронаука во државните средни училишта. Тоа се изведуваше во организација на локалните цркви. Една вечер една голема деноминација изгласа да се повлече веронауката од училиштата. Со нивната одлука, мојата работа се намали за барем 90 отсто. Јас дадов оставка, но комисијата ја спроведе клаузулата според која ако сакам да си заминам, мора да најавам 3 месеци претходно. Јас сметав дека се многу неразумни - имав работно место, ама немаше што да работам... За да не се досадувам и за да правам нешто во сето тоа време со коешто располагав, почнав да пишувам... и оттогаш не престанав!
После она што ми изгледаше како многу разочарувачко искуство, работата којашто ја работам денес - цели 30 години оттогаш - го надрасна сето она што воопшто сум можел да го замислам. Тоа што тогаш ми се случи беше еден од најголемите благослови во мојот живот.
Во текот на Големата депресија, Валас Џонсон, еден динамичен христијанин, бил отпуштен од пиланата каде што работел. За Валас и неговата сопруга тоа било разорна загуба. Па, што направил Валас?
Ја ставил куќата под хипотека и отворил градежна фирма. После 5 години веќе бил мултимилионер и го основал „Холидеј Ин“. Валас вели: „Да можев да го најдам човекот којшто ме отпушти, искрено би му се заблагодарил за она што го стори. Во времето кога тоа ми се случи, не разбирав зошто сум отпуштен. Подоцна видов дека Бог имал непогрешлив и чудесен план да ме однесе на патеката којашто ми ја одбрал“.
Па, драг читателе, дали и ти минуваш низ тешки времиња, времиња на загуба и разочараност? Ако е така, тогаш побарај од Бог да ти објасни на што сака да те научи и за што сака да те подготви; за да може да станеш поплодоносен христијански работник и слуга Господов.
Молитва којашто сега би можел/а да Му ја упатиш на Бог:
Драг Боже, помогни ми низ сите болни искуства да видам дека секогаш има некоја лекција на којашто сакаш да ме научиш. Помогни ми и да станам позрел и поплодоносен христијанин, како и поефикасен сведок за Твоето спасително дејствување.
Ти благодарам што ја чу мојата молитва и одговори на неа! Во името на Исус, амин.
---
Од „Daily Encounter“ на Ричард Инис. Авторските и сите други права припаѓаат на ACTS International. Преземено и обработено со дозвола.
Copyright by ACTS International. Used by permission.
